لسه واقفه

اتولدت وحيدة وسط اتنين قالوا هتبقى دلوعة العين محدش عرف ان الدلع كان وجع ودموع كل ليل كنت طفلة بدور على حضن لقيت خوف بيجري ورايا ايد المفروض تحميني كانت هي اللي بتأذيني جريت لأمي قلتلها الحقيني قالتلي معلش مفيش دليل كلمته عشان ضميره يصحى لقيته بيبصلي و ولا كأنه سامعني حكيت للعيلة كلها الكل سكت، والكل خاف وانا اللي فضلت شايلة الوجع سنين قلت اهرب، اسافر، اغني ما انا بعرف اكتب وارقص واغني كان حلمي الميكروفون والناس تسمعني سافرت ورجعت، روحت لجد وعم قالوا اشتغلي واخدمي رجعت تاني لنفس البيت وعادت ريما لعادتها القديمة قلت اتجوز اي حد المهم ابعد عن هنا واعيش* مفرحتش بفستان ابيض ولا بفرح زي البنات ولا دهب ولا حتى كلمة حلوة تتقالي افتكرت هلاقي الأمان اللي ملقيتوش في ابويا لقيت واحد تاني عايز يدفني وانا حية بخيل، وبيشتم، وبيكدب، وبيعايرني يقولي مجبتيش حاجة زي البنات وانا اللي كنت بحلم ابقى حاجة مهمة اكتفيت بدبلوم وحلمي اتركن على الرف جبتي طفلين وانتي لسه طفلة جواكي حاسة انك عايشة بس روحك ميته كل ما بزعل مع جوزي بفتكر ابويا بخاف اروح هناك وارجع هنا تاني محبوسة بين نارين بس كل ما بعيط، بقوم اغني بقول لسه الحلم جوايا لسه صوتي مراحش اللي مصبرني اني في يوم هبقى المغنية اللي الناس كلها عارفاها عشان الغنا هو الامان والقوة ربنا كبير وشايلي حاجة احلى ومش هستسلم.. مش هستسلم