Xema `işqê perêhtim ez
Hebîba xemrevîn kanî
Seraser têk behêtim ez
Ji derdê ferq û hicranê
Firaqa dilbera rend e
Behêtim herwekî find e
Misilmanek dirê min de
Xeber bit balê sultanê
Xema `işqê perêhtim ez
Hebîba xemrevîn kanî
Xeber bit bal şekerxayê
şepal û xob û zîbayê
Ko mîr e belk-i bîr nayê
Esîrik wê di zindanê
Esîr im lerze û tavê
Mi taqet vê ne perwa vê
Di hebsa wê qe min navê
Bikim firyad û efxanê
Xema `işqê perêhtim ez
Hebîba xemrevîn kanî
Mi navêt ez bi firyad kim
Li zulma dilberê dad kim
şehê dê şubhê Ferhad kim
Bidim rûhê ji kovanê
Ji kovana te şîrînê
Dinalim şubhê goyînê
Dirêjim hêstirên xwînê
Wekî tavê di baranê
Xema `işqê perêhtim ez
Hebîba xemrevîn kanî
Wekî berqa biharî ez
Ji dest çeşmên xumarî ez
Dikim firyad û zarî ez
Meger carek kî ihsanê
Tu pir ihsan û xweyrehm î
Li derwêşan abê xeşm î
çi bîtin ger bi nêv çeşm î
Nezer kî tu li astanê
Xema `işqê perêhtim ez
Hebîba xemrevîn kanî
Li min pirsek bi dildarî
Dibit hempayê dîdarî
Vewesta yim di ferwarî
Li `ebdê xwe ke fermanê
Di fermanê vewesta yim
Di benda xidmetê da yim
Wekî goy bê ser û pa yim
Heman lê dî tu çewganê
Xema `işqê perêhtim ez
Hebîba xemrevîn kanî
