Ny toaka re mazana
Tena fandrika malama
Mahatonga fahotana
Ota be tsy hay tononina
Ny toaka re, indrisy
Ny soa vitany tsy misy
Fa vao maika koa mampisy
Olana eo amin’ny fiaraha-monina
Maro be ireo mafy ady
Mbola misotro ihany, misotro ihany
Na efa hivarina any an-kady aza
Mbola misotro o !
Tsy mety fa efa tena miankin-doha
Ka ny maraina vao mifoha
Mangovingovitra
Ny toaka re ranamana
Tsy mba sarotra hananana
Fa manary ny ao an-tanana
Ny kely ananana no lasany
Ny toaka anefa tsy ajanona
Na dia mila tsy hahavanona
Ho an’ny tsy mahalala onina
Bota kely lasa tapany
Efa miova hatramin’ny endrika
Mbola misotro ihany, misotro ihany
Menamena hatramin’ny molotra
Mbola misotro o !
Tsy misy ny fihezahana hiala
Fa rehefa tena lasa adala
Vao afaka
Ny toaka letsy rahalahy
Be izay efa vita izay
Maninona raha ovaina indray
Tsy sanatria ovaina daina
Ny daina mantsy rey olona
Fahavalom-piaraha-monina
Poizina tsy hay tononina
Aretina manimba saina
Rehefa hita fa tsy lasa intsony
Dia mba aoka izay, aoka izay
Tsy ho lany anie ny toaka sy rongony
Fa mba aoka e !
Maninona raha zavatra hafa indray atao
Ndeha manova kilalao
Mikitikitika
Izaho anie zareo
Efa nisotro toa anareo
Farany io navelako eo
Ny antony dia tsotra ihany
Raha samy hisotro daholo
Ny vahoaka manontolo
Iza indray no hanolokolo
Ireo mamolava be vinany ?
